د جودو او جوجتسو درې کسیزه لوبډلې له ۱۷ کلونو کمعمره اسیايي سیالیو کې د ګډون په موخه نن(دوشنبه، د لړم ۵مه)بحرین هېواد ته روانې شوې.
د یادې درې کسیزه لوبډلې په هره لوبډله کې دوه لوبغاړي او یو روزونکی شامل دی.
د المپیک، بدني روزنې او سپورت عمومي ریاست وایي، دا درې لوبډلې د ورزش ادارې د عمومي رئیس مولوي احمدالله وثيق او د دغې ادارې فني او مسلکي مرستیال حافظ احمد جان ځدراڼ او رهبري سره تر لیدو او خدای پاماني وروسته د بحرین لور ته روانې شوې.
د نویو ځوانانو اسیایي درېیم پړاو لوبې د اکټوبر په ۲۲مه بحرین هېواد کې پیل شوي او دا سیالیۍ په ۲۷ ورزشي رشتو کې ترسره کېږي چې د افغانستان په استازیتوب ۵۰ ورزشکاران او ورسره پلاوي په ۸ ورزشي رشتو کې سیالۍ کوي.
د یادولو وړ ده له دې وړاندې له ۱۷ کلنو کم عمره فوټسال لوبډلې هم د نویو ځوانانو اسیا سیالیو دریم پړاو سیالیو کې درې لوبې له ازبکستان، بحرین او چین لوبډلو سره ترسره کړې چې ټولې لوبې یې وګټلې.
