کابل – د افغانستان د کانونو او پترولیم وزارت اعلان کړی چې له ترکي شرکت “سفیر سونداج” سره یې د ۸ میلیونه ډالرو ارزښت لرونکی تړون لاسلیک کړی، چې له مخې به د جوزجان ولایت د یتیمتاق په سیمه کې درې د ګازو څاګانې کیندل کېږي.
افغانستان ژورنال – دا تړون د ۱۴۰۴ کال د جوزا په ۱۰مه (د ۲۰۲۵ کال د مې ۳۰مه) نېټه د کانونو او پترولیم سرپرست وزیر ملا هدایتالله بدري، د مالي او اداري چارو مرستیال مولوي حسامالدین صبري، د وزارت سلاکار مولوي مطیعالله حقاني، او د تدارکاتو رئیس مولوي میر محمد نبي محمدي په حضور کې رسمي لاسلیک شو.
د تړون له مخې، ترکي شرکت مکلف دی چې د یو کال په موده کې درې څاګانې بشپړې وکیندي.
اټکل کېږي چې له فعالېدو وروسته، دا څاګانې به په مجموع کې هره ورځ ۱۰۰,۰۰۰ مکعب متره ګاز تولید کړي.
د وزارت چارواکو ټینګار کړی چې دا پروژه به نه یوازې د هېواد د ګازو اړتیاوې تر یوه بریده پوره کړي، بلکې افغان وګړو ته د کار زمینه هم برابره کړي.
دا نوښت د کورنیو طبیعي سرچینو د پراختیا او د وارداتي انرژۍ پر ځای د ملي ځانبسیا په لور یو مهم ګام بلل شوی دی.
افغانستان ژورنال
